في الاول الف مبروك لكل الشباب اللي تفوقوا في ثانوية عامة ونجحوا انهم يدخلوا طب المنصورة ويضمنوا لنفسهم مكانة كبيرة في المستقبل ان شاء الله
طبعا قبل ما تدخلوا الكلية سمعتوا كلام كتير عن طب المنصورة وصعوبة طب المنصورة وقد ايه طب صعب ومحتاج مجهود
وأكيد برضه سمعت ناس بتقول يا عم كبر دماغك وعيش حياتك المهم انك خلصت ثانوي والكلية كده كده هاتتخرج منها دكتور
بص يا دكتور أو يا دكتورة
ماتعقدش نفسك بالكلام اللي فوق
ولا تسمع الكلام اللي تحت
انت واحد داخل الكلية عشان تطلع دكتور
يبقى تذاكر كويس وتفهم على قد ما تقدر وماتضيعش وقتك عشان تتخرج دكتور كويس تفيد نفسك وتفيد نفسك
وبرضه ماتتعقدش وماتحسسش ان الكلية تقيلة قوي وصعبة
يعني الناس اللي بتتخرج منها دي بتتخرج ازاي؟!!!
هنفهمّك نظام الكلية واللي محتاج تذاكره وايه المهم وايه وكل حاجة ان شاء الله
في الموضوع ده هنشرح نظام الكلية واحدة واحدة كده
في الأول هناخد بس نبذة بسيطة كده عن تاريخ الكلية واعلامها
تعتبر كلية الطب النواة الأولى لجامعة المنصورة
في عام 1962 صدر القرار الجمهوري بقانون رقم 1947 بإنشاء كلية طب المنصورة تابعة لجامعة القاهرة ويكون مقرها مدينة المنصورة
اشرف على إنشاء الكلية وتولى الإدارة بها في ذلك الوقت المرحوم الأستاذ الدكتور /ابراهيم أبوالنجا
بدأت الدراسة بالكلية في العام الجامعي 62/1963 في احد مباني مدرسة المنصورة الثانوية للبنين
في العام 67/1968 صدر قرار وزاري بنقل تبعية مستشفى المنصورة الجامعي إلى كلية الطب ليصبح مستشفى جامعيا اعتبارا من العام 68/1969
قطعت الكلية شوطا كبيرا من الإنجازات في فترة زمنية وجيزة بفضل جهد وعطاء من تولوا أدارتها وتحملوا أمانة العمل فيها بكل صدق وتولوا عماداتها
انتقلت الدراسة بكلية طب المنصورة إلى مبناها الحالى فى عام 1968 وكان عدد الطلاب عند بدء الدراسة فى العام الجامعى 1962/63 (157) طالبا وتضاعف عدد الطلاب حاليا
تخرجت الدفعة الأولى من الكلية في العام الجامعي 67/1968 وكان عدد الخريجين 64 طبيب وطبيبة منهم 30 يشغلون درجة أستاذ حاليا
العمداء
منذ بداية انشاء الكلية تعاقب عليها اثنا عشرة عميداً
وهم بالترتيب
أ . د / إبراهيم أبو النجا الجزار
فسم الهستولوجى
من 1962 إلى 27/6/1971
أ . د / كمال الدين كامل أحمد
قسم الباثولوجى
من 28/6/1971 إلى 26/9/1980
أ.د / محمد الشبراوى على
قسم الصحة العامة
من 8/10/1980 إلى 7/10/1983
أ.د / فاروق أمين عزت
قسم الجراحة العامة
من 8/10/1983 إلى 7/10/1985
أ.د / عفت عبد الغنى هارون
قسم الفارماكولوجى
من 7/11/1985 إلى 15/11/1988
أ.د / حمدى إبراهيم العيشى
قسم التشريح
من 16/11/1988 إلى 21/4/1991
أ.د / محمد رفعت النحاس
قسم الفسيولوجيا
من 2/5/1991 إلى 2/5/1994
أ.د / محمد مصطفى حافظ
قسم طب الأطفال
من 3/5/1994 إلى 2/5/2000
أ.د / على عبد اللطيف حجازى
قسم الأمراض الجلدية
من 3/5/2000 إلى 27/8/2003
أ.د / مدحت محمد على
قسم الميكروبيولوجيا
من 4/9/2003 إلى 31/7/2005
أ.د / فرحة عبد العزيز الشناوى
قسم الباثولوجيا الإكلينيكية
من 1/8/2005 إلى 17/9/2007
أ.د / عمرو على سرحان
قسم طب الأطفال
من 29/11/2007 حتى الآن
نرجع بقا لسنة أولى
قدمنا خلاص الرغبات وعرفنا اننا قبلنا في طب المنصورة
اخدنا الملف ورحنا الكلية قدمناه
الخطوة الجاية هي الكشف الطبي
بيكون فيه ورق متعلقة في الكلية او بتسأل في شئون الطلبة عن ميعاد الكشف الطبي
تعرف الميعاد وتروح يومها الصبح بدري عشان تلحق مكان في الطوابير قبل الزحمة
هايتعمل كشف سريع كده وتاخد تطعيمات وشهادة انك اتطعمت
الشهادة دي هتحتاجها ضمن اوراق الكلية
الطالبات في يوم
والطلبة في يوم
خلاص خلصت
تروح الشئون تسأل عن المصاريف عشان تدفع
ولو مش مستعجل
عادي
الدفع ممكن يستنى شوية لغاية اخر السنة
لو مدفعتش قبل الامتحانات
نتيجتك مش هاتظهر وهاتكون محجوبة لغاية دفع المصاريف
الناس اللي ناوية تسكن في المدينة الجامعية
لازم تدفع بدري لان ايصال الدفع ده من شروط المدينة الجامعية
ع العموم
بعد من خلص الشغل الروتيني بقى بتاع المكاتب ده وشوية اللف اللي في الاول
هتلاقي كل حاجة خلاص تمام والدراسة بدأت
وقبل ماندخل بقى في الدراسة ونبدأ نتكلم عليها
الناس الجديدة اللي مش عارفة مكان الشئون أو مكان اي حاجة في الكلية
الصور الجاية دي خريطة مبسطة للكلية هتساعدكم شوية
مباني الكلية عبارة عن اربعة ادوار
عشان كده هايكون فيه اربع صور
صورة بتمثل كل دور لواحده
دي صورة الدور الاول
ودي الدور الثاني
ودي صورة التالت
وده الدور الرابع
الدايرة السودا اللي فيها سهم دي هي بوابة الكلية
ومعلش انا عارف ان الصور باينة معقدة قوي وصعبة
لكن بعد نزول الكلية مرة او مرتين هاتتفهم تمام ان شاء الله
نتكلم عن:
التقدير
بيتحسب ازاي التقدير ومن كام الامتيازامتياز 85% فاكثر من مجموع الدرجات
جيد جدا من 75% الى اقل من 85% من مجموع الدرجات
جيد من 65% الى اقل من 75% من مجموع الدرجات
مقبول من 60% الى اقل من 65% من مجموع الدرجات
اما رسوب الطلاب فيقدر باحد التقديرين الاتيين
ضعيف من 30% اى اقل من 60% من مجموع الدرجات
ضعيف جدا اقل من 30% من مجموع الدرجات
وطبعا أول حاجة هتيجي على بالكم ان الموضوع تافه جدا
ازاي الامتياز من 85% بس؟!
ده احنا جايبين في ثانوي 99% b)
لأ
الموضوع مش بالسهولة دي
في الكلية سهل جدا إنك تضيع منك درجات
انت بتمتحن امتحانات كتير وكل امتحان بتنقص فيه كذا درجة
لما بيتجمعوا في النهاية بتلاقيك ضيعت درجات كتير جدا
يعني الامتياز مش بالسهولة اللي انتوا هتتخيلوها في الاول كده ومحتاج مجهود كبير
بس انتوا قدها وقدود ان شاء الله
طيب التقدير العام في اخر سنة
بيتجمع درجات المواد كلها في كل السنين عدا درجة اللغة الانجليزية والحاسب الالى وحقوق الانسان
ملحوظة
مادة العلوم السلوكية والإنسانية في سنة تانية مادة صغيرة كده ومحدش بيهتم بيها
للعلم المادة دي بتضاف لمجموع السنة وللمجموع النهائي كمان
طيب
يعني ايه مرتبة الشرف
مرتبة الشرف يعني تقدريك في السنين من اول اولى لغاية ما اتخرجت مقلش عن جيد جدا
يعني لو جبت في سنة جيد او مقبول
كده المرتبة ضاعت
وهي اسم فخري يعني مش معنى انك معكش مرتبة الشرف ان ده هيأثر على شغلك بعدين
لا المهم تقديرك الكلي
النظري
اللي هو المحاضرات
الدفعى بتتقسم على مجموعتين او تلاتة
غالبا السنة دي هايبقوا مجموعتين أ و ب
كل مجموعة بتدرس في مدرج مختلف عن التانية
المدرجات لو كانت زي السنة اللي فاتت
يبقى المجموع أ في مدرج محمد مصطفى حافظ
ومجموعة ب في مدرج ابراهيم أبو النجا
تعرف ازاي مجموعتك؟
هتلاقي ورقة متعلقة عند شئون الطلبة فيها الاسامي والمدرج اللي انت فيه
مكان المدرجات فين؟
فيه خريطة فوق
أو تسأل حد من زمايلك يومها
طيب جدول المحاضرات فين؟
هو لسه لغاية دلوقتي جودل السنة دي ما نزلش
لما بينزل بيتعلق على عند الشئون برضه
وهايتوزع عليكم في اول يوم دراسة من الاسر الموجودة في الكلية
مدة المحاضرة ساعة في الايام العادية
في رمضان بتكون 45 دقيقة
الشرح في المدرجات زي ما قلنا باستخدام الميكروفون والبروجكتور(جهاز الاسقاط ) واحيانا على السبورة
هل فيه غياب في المحاضرات؟
لأ مفيش
مين بيشرح المحاضرات؟
الدكاترة لكن السكاشن بيشرحها المعيدين
هل المحاضرات مهمة؟
فيه ناس مش بتحضر
بس المحاضرات بتفيد جدا
طيب الكلام اللي في المحاضرة موجود في الكتب بره؟
ايوه بس أحيانا الدكاترة بيطلبوا تضيفوا حاجات او بيشرحوا بطريقة مختلفة عن الكتاب
مواعيد المحاضرات
في الجدول
غالبا بتبدأ 8 الصبح
وفي رمضان بتبدا 8:45 دقيقة
بس مش هيكون دراسة في رمضان السنة دية 2009
كده اتكلمنا عن المحاضرات
المرة الجاية هنتكلم عن العملي
أي استفسار؟
العملي
اتكلمنا عن النظري
نتكلم عن العملي بقى شوية
العملي اللي هو السكاشن
الدفعة بتتقسم على كذا سيكشن العدد في كل سيكشن بيكون حوالي60-70
والسيكشن بيتقسم مجموعتين A&B
يعني مجموعة العملي بيكون فيها حوال 30 فرد
تعرف ازاي السكشن بتاعك؟
بيتعلق في الاقسام مكتوب فيه الاسماء والسكاشن
مواعيد بدء السكاشن
بتبدأ بعد بداية الدراسة باسبوعين لشهر يعني في الغالب السنة دي هاتبدأ بعد العيد على طول
مدة السكاشن
الفسيولوجي والهستولوجي والبيوكيمستري ساعتين كل سكشن
سكشن واحد في الاسبوع
التشريح بيبقى ساعة واحدة
3 او 4 سكاشن في الاسبوع
مين بيشرح السكاشن؟
المعيدين
فيه غياب في السكاشن؟
ايوه فيه غياب واللي حضوره بيقل عن 70% من السكاشن بيتحرم من دخول الامتحان
أماكن حضور السكاشن
مش في المدرج زي المحاضرات لكن كل سكشن في القسم بتاعه
السكاشن مهمة؟
اكيد طبعا
بتشوف فيها العملي بعينك وده بيسهل جدا فهم النظري
كمان احيانا بيتشرح في السكشن اجزاء من النظري وعشان المعيدين بيشرحوا باسلوب بعيد عن رسمية المحاضرات وبيكون فيه تفاعل اكتر من المحاضرات
بيكون الفهم اسهل في السكشن
درجات العملي كام؟
20% من المنهج
العملي بيتذاكر منين؟
كل قسم بينزل كتاب عملي
وكمان اخر السنة بتنزل مذكرات مختصرة كده لعملي كل مادة
نظام السكاشن بقى
التشريح
في متحف التشريح
هاتشوف فيه العظم وهايتشرح كل حاجة فيه
وهايكون فيه جارات jars
والجارات دي عبارة عن برطمانات زجاج فيها أجزاء بشرية محفوظة في مادة الفورمالين (وما تخافش هاتتعود!)
تتعرف على كل جار وعلى الاجزاء اللي فيه (الاعصاب والاوردة والشرايين والعضلات....)
كمان بيكون فيه شرح نظري للاجزاء الصعبة من المنهج وتجميعات تسهل الحفظ شوية
كتاب العملي بيكون فيه صور للعينات اللي في المتحف
وبيطلب منك اخر السنة رسم العينات دي في الكتاب بايدك
الفسيولوجي
في قسم الفسيولوجي في الدور الثالث
سكشن واحد ساعتين كل اسبوع
هيتراجع فيه على أجزاء من النظري مهمة ومتعلقة بالعملي
وهاتشوف فيه بقا الاجهزة الطبية وبتستخدم ازاي
وهاتتعلم في مع الوقت قراءة رسم القلب و قياس الضغط والحاجات دي
الهستولوجي
في قسم الهستولوجي في الدور اللي فوق قسم التشريح
سكشن ساعتين كل اسبوع
هاتشوف فيه تحت الميكرسكوب الخلايا والانسجة المختلفة في الجسم
وتتعلم ازاي ترسمها
وكتاب العملي لازم يترسم فيه الانسجة دي
هتحتاج قلمين الوان خشب احمر وازرق عشان ترسم بيهم لأن دي الوان الصبغات اللي بتستخدم في صباغة الانسجة تحت الميكرسكوب
البيو كيمستري
قسم الكيمياء في الدور التاني تحت قسم الفسيولوجي
في السكشن ده هاتعمل بايدك تجارب كتير
المفروض ان بيجيلك مادة في انبوبة اختبار وانت تتعرف المادة دي ايه
بتعمل سلسلة من التجارب لغاية ما توصلها
والكتاب معاك برضه في اخر كل سكشن تكتب فيه المعادلات والتجارب اللي اخدتها في السكشن
وبكده يبقى اتكلمنا عن السكاشن
فاضل بس نظام امتحان العملي وده هنتكلم عنه في مشاركة تانية بعدين ان شاء الله
ايه هي بقى المشرحه؟!
المشرحه دي من اكتر الحاجات اللي في كليه الطب اللي بتثار حولها الخرافات و الخزعبلات , و لازم تكون متوقع انك ان شاء الله اول ما هتوصل بيتك بالسلامه من الكليه في اول يوم هتنهال عليك الاسئله حول هذا المكان العجيب من كل اللي تعرفهم ... فمثلا حد يقولك"ها قوللي عملت ايه اول مدخلت المشرحه؟! اغما عليك ..ها؟!"
و غيره " هوا فعلا هناك في ميتين ؟!" وغيره كتير اكيد هتكتشفها بنفسك
الموضوع ابسط من كدا بكتير المشرحه دي المكان اللي بنتلقى فيه الدروس العملي لمادة التشريح .. يعني انت قاعد في المحاضرات تسمع عن arteries و veins و غيرها لازم طبعا تعرف الحاجات دي شكله ايه جو الجسم و تعرف كمان الفرق بنها و دا اللي بيوريهولك الدكتور على الجثه في المشرحه
لكن طبعا اكيد برده الموضوع و في اول مره بيبقى غريب شويه لكن بالتكرار الواحد بيتعود و بتصبح المشرحه بالنسبه للطلبه مكان عادي .... يعني عندنا مثلا في القصر العيني الناس بتعتبرها مكان التجمع و تلاقي واحد بيقول لصاحبه قابلني قدام المشرحه .... اهو شفتوا عادي جدا
بس في بعض الحاجات حابه اقولها :اداب التعامل مع المشرحه
1- لازم تحط في بالك ان الميت دا كان في يوم من الايام انسان زيك زيه فلوسمحت التعامل يكون فيه احترام لحرمة الميت
2- طبعا مش محتاجه اقول ان التصوير بالتليفون المحمول دا حرام كبير .. تخيل ان اللي قدامك دا ابوك " الله يديله طولت العمر " هتحب حد يعمل فيه كده ؟!
3- لا تنسى مهمتك الاساسيه و هي انك بتتعلم مش جاي تلعب بناس ظروفهم هي اللي وضعتهم في هذا المكان و ان شاء الله يكون لهم ثواب الصدقه الجاريه
4- احذر ان تتهاون بكسر شيء في جسم الجثه او قطع شيء فيها حرام ..حرام ,ده غير انك هتضر نفسك و غيرك
5- ياريت تخلي دخولك المشرحه عظه ليك و تذكير بلاخره و انك ميت ميت و متنساش الدعاء للميت ده ,و متبخلش علي الناس التانيه بالنصح لو لقيتهم بيعملوا حاجه غلط
ايه الادوات اللي هحتاجها في مادة التشريح ؟
1- اكيد البالطو الابيض
2- جوانتيات بلاستيكيه او مطاط
3- فورسبس (ملقط)
4- ممكن تحتاج عده تشريح بس هي مش مهمه و على العموم متستغلاش اخرك 8 جنيه
وكل ده على حسب الكلية والدكتور
بعد ملا اتكلمت عن الادوات اللي ممكن نحتاجها اكيد كل واحد دلوقتي بيقول هذاكر ازاي و منين ؟
مقدرش اقول لاي حد يذاكر ازاي لان كل واحد له الطريقه اللي بيستوعب بيها و الانسب له لكن ممكن اقولك في التشريح تركز على ايه في المذاكرة و لو ان كله مهم
1- بالنسبه للعظم مهم جدا تكون عارف ايه الحاجات اللي ماسكه في العظمه دي لان دا هيسهللك كتير كذاكرة العضلات و كمان مهم في الامتحان الشفوي و العملي(spotting)
2-اما الشريين مهم جدا تعرف التفرعات (branches) و الشبكات اللي بيشارك في صنعها (anastomosis)
3- الاعصاب بقي تركز علي العضلات اللي بيغذيها العصب و ال branches و كمان مهم جدا جدا التشوه الناتج عن اصابه العصب nerve injury
4-في حاجه كمان اسمها spaces او regions زي ما هتعرفوا بعد كده مثل cubital fossa ,femoral triangle لانها ممكن تيجي سؤال كامل
ييجي بعد كده سؤال طب هذاكر منين ؟
لازم تبقي عارف ان النظام في الكليه غير المدرسه يعني عندك الحريه انك تذاكر من المصدر اللي يريحك
اما كتاب القسم و اللي يفضل انه يكون عندك و تهتم بيه لان غالبا رئيس القسم هو اللي بيحط الامتحان , هتلاقي كمان دكاتره منزله كتب خاصه بيها ممكن لو حابب تشتريها في كمان مذكرات الدروس الخصوصيه ممكن الاستعانه بها لان غالبا الدكتور بتاع الدرس بيكون مجمع فيها اهم الحاجات و الاسئله اللي ممكن تتسئل في الشفوي و مهم جدا يكون عندك اطلس كويس لان الرسومات بتساعد جدا في فهم الanatomy
كمان المحاضرات مهمه جدا و السكاشن مهمه جدا جدا حاول على قد ما تقدر تكتب كل اللي بيتقال او ممكن كمان تسجل دي طريقه كويسه قوي
طب ايه بقى يا تري حكايه الدروس الخصوصيه دي ؟
الدروس فعلا منتشرة جدا في كليتنا و حوالي 75% من الطلبه بياخد دروس و لكن انا مبنصحش اي حد بيها و عن تجربه شخصيه مدام انت بتحضر محاضرات و سكاشن و بتذاكر اول باول مش هتحتاج الدروس و صدقوني
اكيد بعد ما عرفنا تقريبا كل حاجه عن الanatomy عايزين نعرف ايه نظام الامتحان ؟
الامتحانات في الكليه تنقسم الي نظري (written و MCQ) و عملي و شفوي
1- الامتحان النظري :
بيكون في نص السنه (اعمال سنه) و اخرها
و علشان ان شاء الله تجاوب كويس لازم تكون طبعا مذاكر كويس غير كده لازم تكون مدرب على اسئلة الMCQ (او الاختيار من متعدد) لان النوع ده من الاسئله مهم جدا في كليتنا , كمان لازم تكون و انت بتذاكر متعود ترتب افكارك و تركز علي العناوين الرئيسيه اللي لو جالك سؤال في الجزء ده هتتكلم فيها .. و صدقوني مهم جدا تكون عارف النقط و العناوين الاساسيه لكل موضوع لان غالبا وقت الامتحان لايكفي لذكر كل التفاصيل , كمان في ال anatomy بالذات الرسومات لها و قع السحر على المصحح فحاول من اول السنه تتدرب عليها و مش لازم يا اخي يكون رسمك حلو انت مش بيكاسو بس على الاقل يكون واضح و معبر
2- الامتحان العملي : عملي ال anatomy بنقول عليه spotting في الامتحان بيجيلك حاجه معينه متحدده بعلامه و المطلوب تقول ايه الحاجه دي و ممكن يسألك سؤال بسيط عليها
لو انت ملتزم بحضور السكاشن فالامتحان ده هيكون بالنسبه لك سهل ان شاء الله
3- الشفوي : الامتحان الشفوي بيكون مصدر رعب للطلاب من اول السنه و دا نتيجة الخرافات و الاشاعات اللي سمعوها عنه من اول يوم دراسه .. مثلا حد هيقولك الدكتور فلان ده بيموت الطلبه و في الاخر يديك صفر .. و اللي هيقولك الدكتور فلان اللي عامل نفسه طيب ده بيسأل اسئله مستوى دكتوراه
كل دا كلام فاضي بس خلينا صرحه امتحان الشفوي دا رزق ممكن يكون حظك مع دكتور يقتنع باي اجابه هتقولها و ممكن واحد تاني يكون بيحب الطالب الperfect دا غير طبعا الوسايط اللي بتخش في الموضوع
بس انت اهم حاجه تكون عامل اللي عليك و مذاكر و متوكل على ربنا بالنسبه لل anatomy ركز كويس جدا علي العظم لانه غالبا مفتاح الامتحان
حاجه تانيه في ناس هتقولك لازم تكون لابس formal مش شرط المهم يكون لبسك مهندم و ميستفزش الدكتور
الbiochemistry او الكيميا الحيويه و اختصارا الbio ماده بتناقش كيمياء الجسم و التفاعلات اللي بتحصل جواه في سنه اولى بندرس الcarbohydrates بنعرف فيها تركيب السكريات البسيطه simple sugars و خصائصها و تفاعلاتها و كمان كيفيه ارتباطها لتكوين oligo و polysaccharides متشغلوش بالكم بالمسميات دلوقتي
غير كده بندرس الدهون lipids و بنعرف ايه هي الاحماض الدهنيه و الكوليسترول و دخوله في مركبات كتيره زي الهورمونات و عمل كل هرمون منهم
كمان البروتيناتproteins و اللي بتتكون من احماض امينيه amino acids و ارتباطها لتكوين عديد الببتيد و اشكال البروتينات المختلفه و وظائفها
اما بقى المتعه اللي بجد هتبدأ مع دراسه الاحماض النوويه nucliec acids او الDNA جزء شبيه باللي درسناه في الثانوي بس مع تفصيل اكتر , الجزء ده مهم جدا و لذيذ جدا في فهمه دا كان المفضل عندي
كمان في جزء ظريف و هو acid base balance او التوازن بين الاحماض و القواعد و ازاي الجسم بيحافظ على نسبه ثابته بينهم و الامراض اللي بتغير النسب دي
ده النظري اما العملي
عملي الbio لذيذ جدا و سهل جدا لو اهتميت بحضور السكاشن
بنعمل تجارب تخليك تقدر تعرف المحلول اللي قدامك ده carbohydrates ولا protiens الخ...
كمان بنعمل تجارب للتفريق بين المركبات في المجموعه الواحده يعني مثلا الglucose و الfructose الاتنين من الcarbohydrates بنفرق بينهم بtest اسمه سيلفانوف ... و مش قادره احكيلكم على اللون التحفه اللي بيطلع cherry red تحس انك عايز تشربه ... و ها كذا تجارب الbio كلها الوان تجنن
عايز اقولكم ان حضور السكاشن و عمل التجارب بأديك مهم جدا .. مهم كمان كتابت الخطوات اللي هتمشي عليها او الscheme و الكميات اللي هتحطها من كل ماده زي مثلا 2ml من الsolution و عليهم 2ml من alcoholic alpha napthol و الاسامي المكعبله دي ... كمان مهم تكون عارف الخواص الطبيعيه للماده زي مثلا لونها ريحتها و ما ادراك ما الروايح في الbio طعمها ..بس اوعى تدوق حاجه .. هل هي حمضيه او قلويه
عارفين ايه اغلس حاجه في الموضوع الtest tubes او انابيب الاختبار و الholders او الماسك
من ناحيه لان الانابيب دي بتكسر كتير جدا.. تبقى واقف في امان الله و اذ فجأه تششششششش ..ايه دا ؟ عادي الانبوبه اتكسرت اصل الholder كان واسع
و من ناحيه تانيه لان غالبا اللي بيديك الانابيب دي بيكون عمال المعمل و الامر لايخلو من "فين الشاي بتاعنا يا دكتور" و "يا رب اشوفك عميد الكليه" و "لو عزت اي حاجه اسأل بس على عم محمود" و عبارات مشابهه كتير هتسمعوها طول السنه, و طبعا الهدف منها انك تخلي عندك نظر و تشوف الراجل ده بقرشين .. المهم انك تنوي بيهم الصدقه!
حاجه كمان مهمه احب انبه عليها و هي ضرورة لبس البالطو ..و يا ريت كمان تلبس اوحش حاجه عندك يوم سكشن الbio لان انت بتتعامل مع مواد كيماويه و احماض و لو معملتش كده يبقى على اخر السنه هتلاقي هدومك كلها عايزه تترمي
ان شاء الله متتعرضوش للحوادث دي و تستمتعو بالسكشن
مواد سنة أولى
قلنا قبل كده على اسامي المواد لكن هانكلم باختصار شوية عن كل مادة
سنة أولى فيها أربع مواد أساسية
التشريح Anatomy
فسيولوجي Physiology
هستولوجي Histology
كيمياء حيوية Biochemistry
ومادتين مش بيتضافوا للمجموع
اللغة
والحاسب الالي
التشريح وعلم الاجنة
من اسمها طبعا دي المادة اللي هاتدرس فيها أعضاء الجسم المختلفة وتعرف اسم كل جزء والشريان اليي بيغذيه والوريد اللي خارج منه والاعصاب الموجودة فيه والعلاقة بينه وبين الاعضاء اللي حواليه
ويمكن التشريح يكون هو اصعب مواد السنة لان حجمه كبير والاسامي فيه صعبة وبيحتاج لحفظ كتير
وعليه 250 درجة
في سنة أولى هتدرس
الطرف العلوي Upper limb
الصدر thorax
منطقة البطن Abdomen
منطقة الحوض pelvis
وبقية الجسم ان شاء الله في سنة تانية
في فرع كمان اسمه علم الاجنة Embryology
وده هتدرس فيه ان شاء الله نمو الجنين من بداية تخصيب البويضة لغاية اكتمال النمو بالتفصيل
ومقسوم على سنة اولى وتانية
القسم بينزل كتاب وفيه مذكرات موجودة في المكتبات اللي موجودة في الكلية وحواليها
وهتحتاج اطلس تشريح في الصور عشان يساعدك في الفهم
فيه اطلس تبع القسم
وممكن تشتري اطلس من بره
اطلس جرانتس اشهر اطلس تشريح
الفسيولوجي
علم وظائف الاعضاء
مادة مهمة جدا جدا وعليها 250 درجة
هتدرس فيها بالتفصيل اجهزة الجسم المختلفة وازاي بتشتغل وازاي بتتكامل مع بعضها
فروعها
الفيزياء الحيوية Biophysics
القلب والاوعية الدموية Cardiovascular system
العضلات Muscles
الاعصاب Nerves
الجهاز العصبي الطرفي Peripheral nervous system
الجهاز العصبي المركزي Central nervous system
الجهاز التنفسي Respiratory system
الجهاز الهضمي Gastro-intestinal tract
الكلية Kidney
اعضاء الحس الخاصة Special sensory organ زي العين والسمع والاتزان
وظائف الغدد Endocrine system
و الهرمونات Hormones
ودول مقسومين على سنة اولى وتانية برضه
ووبرضه فيه كتاب في القسم ومذكرات في المكتبات
الهستولوجي
علم الانسجة والخلايا
هتدرس فيه تركيب الخلية وانواعها والاختلافات بين الانسجة المختلفة وتركيب الخلايا في كل نسيج في الجسم
المنهج مقسوم برضه على سنة اولى وتانية
عليها 150 درجة
ممكن دي تكون ابسط مواد اولى عشان اسهل شوية من المواد التانية
البيوكيمستري
الكيمياء الحيوية
150 درجة برضه
وهاتدرس فيها المعادلات اللي بتحصل جوه الجسم والتمثيل الغذائي
وتدرس كيمياء المواد اللي بتعتمد عليها في الغذاء زي البروتين والكربوهيدرات والدهون
كمان هتدرس كيمياء الفيتامينات والانزيمات في الجسم والحمض النووي DNA
مختلفة شوية عن كيمياء ثانوي واصعب منها
وبرضه موجود كتب ومذكرات
ودي المواد الاساسية
المواد الفرعية بقى
الحاسب الالي
مش بيتضاف للمجموع بينزله ورق في اخر السنة وبيتذاكر الفترة اللي قبل الامتحان على طول
محاضرة واحدة ساعة في الاسبوع
اللغة
المصطلحات الطبية ومعانيها
بتكون صعبة شوية في اول السنة لكن بتبقى سهلة جدا اخر السنة بعد ما تكون درست الكتير من كلماتها خلال المواد التانية
وبصراحة هي مفيدة جدا
يعني لو اتذاكرت اول السنة هتسهل كتير فهم مصطلحات المواد التانية
لكن المشكلة ان كتابها مش بينزل غير اخر السنة
المنهج
هنتكلم المرة دي عن المنهج المقرر في الكلية
ايه المواد اللي عندنا وهندرسها امتى وازاي
الدراسة على مرحلتين
المرحلة الأولى :
العلوم الطبية الأساسية (سنة اولى وتانية وتالتة)
المرحلة التانية:
العلوم الطبية الاكلينيكية (رابعة وخامسة وسادسة)
توزيع المواد على السنوات الدراسية:
الفرقة الأولى :
التشريح الآدمى وعلم الأجنة
الهستولوجي
الفسيولوجي
الكيمياء الحيوية
اللغة الإنجليزية
الحاسب الآلى
الفرقة الثانية
التشريح الآدمى وعلم الأجنة
الهستولوجيا
الفسيولوجيا
الكيمياء الحيوية الطبية
العلوم السلوكية والإنسانية
الفرقة الثالثة
الباثولوجيا
الفارماكولوجيا
الميكروبيولجيا والمناعة الطبية
الطفيليات
الفرقة الرابعة
طب وجراحة العيون
الأنف والأذن والحنجرة
الطب الشرعى والسموم الاكلينيكية
طب المجتمع
حقوق الانسان والمبادئ القانونية العامة
الفرقة الخامسة
الأمراض الباطنة وفروعها
طب الأطفال
الفرقة السادسة
الجراحة وفروعها
أمراض النساء والتوليد
نيجي لمنهج أولى
الجدول الجاي ده بيوضح تقسيمة المنهج وعدد الساعات العملية والنظرية وتوزيعة الدرجات
يعقد الامتحان سنويا على دورين:
الدور الاول في نهاية العام الدراسى فى شهر مايو في جميع المواد
الدور الثاني في شهر سبتمبر للراسبين والمتخلفين – ولا يعوق الرسوب او التخلف فيما لا يزيد عن مادتين من المواد الطبية من انتقال طالب الفرقة الاولى الى الفرقة الثانية بالاضافة الى مادة اللغة الانجليزية والحاسب الالى
الفرقة الأولى :
التشريح الآدمى وعلم الأجنة
الهستولوجي
الفسيولوجي
الكيمياء الحيوية
اللغة الإنجليزية
الحاسب الآلى
الفرقة الثانية
التشريح الآدمى وعلم الأجنة
الهستولوجيا
الفسيولوجيا
الكيمياء الحيوية الطبية
العلوم السلوكية والإنسانية
الفرقة الثالثة
الباثولوجيا
الفارماكولوجيا
الميكروبيولجيا والمناعة الطبية
الطفيليات
الفرقة الرابعة
طب وجراحة العيون
الأنف والأذن والحنجرة
الطب الشرعى والسموم الاكلينيكية
طب المجتمع
حقوق الانسان والمبادئ القانونية العامة
الفرقة الخامسة
الأمراض الباطنة وفروعها
طب الأطفال
الفرقة السادسة
الجراحة وفروعها
أمراض النساء والتوليد
حمل أطلس جرانتس مجانا
من هذه الموقع تستطيع ان تحمل كتاب جرانتس
وهو عبارة عن اطلس تشريح معتمد عالميا
وليس عليك الا ان تبحث عن برنامج اكروبات
لكى تستطيع تصفح الكتاب على جهازك
بدون ان تضطر الي دفع مبالغ مالية هائلة لشرائه
فتفضل مشكورا بالضغط هنا
الكتب والمذكرات
كل قسم بينزل الكتب الخاصة بيه
وممكن تشتري الكتب دي من القسم نفسه
او احيانا بتتباع في مكتبات بره الجامعة بيكون القسم متفق معاها
وفي المدرج الدكاترة هايقولوا المكتبات دي ايه وعنوانها فين اول السنة
الكتب بتبقى شاملة جدا وكبيرة وحجمها ضخم طبعا اللي يذاكرها بيتعب جدا بس بيستفيد من كم المعلومات الضخم اللي هو عرفه ده بعدين
الكتب بتبقى غالية عن المذكرات بكتير وفيه ناس مش بتشتريها
بس احيانا بتكون مجبر تشتريها عشان كتاب العملي بيبقى ضمنها وممكن ما يتباعش من غيرها والكتاب ده بيكون عليه درجات
المذكرات بقى
بيبقى فيه اكتر من مذكرة لاكتر من دكتور
شوف زمايلك اغلبهم جاب مذكرات مين وخليك معاهم
لو حسيت انك مش فاهم غيّر وهات مذكرات حد تاني
واللي ترتاح معاه كمل معاه
ميزة المذكرات انها مختصرة وبتجيب الخلاصة بعيد عن الاستطالة بتاعت الكتاب
وبتساعدك تعرف تخلص المنهج وتلحق تراجع
المذكرات بتتباع في المكتبات اللي جوه الكلية
وفيه مكتبات بره حوالين الجامعة هاتعرفهم بالتدريج من زمايلك
فيه ناس بقى بتحب تقرا في المراجع الكبيرة والحاجت الضخمة دي بتشتريها او بتدونها من النت وتذاكر منها
طبعا مفيدة جدا في الحياة العملية بعدين
لكن للاسف مش هاتعرف تجيب مجموع وانت بتذاكر منها
أول يوم دراسة
اول يوم ده بيكون يوم غريب جدا
بتنزل الكلية مش عارف اي حاجة وحاسس انك غريب
مين الناس دي كلها ؟!! هو فيه ايه؟!!
فين المدرجات ؟ وفين الجدول ؟
مش فاهم اي حاجة في اي حاجة وحدش حواليك فاهم حاجة
متاخدش في بالك خالص
اول ما هتروح هتلاقي في الكلية اجتماعات نشاطات اسرية
يعني ايه؟
الاسر دي مجموعات نشاط طلابية بتقدم خدمات للطلبة ترفيهية واجتماعية ورحلات ومجلات واعمال ادبية واحيانا مذكرات وكده يعني
هتلاقي في الاسر دي الناس الاكبر منك موجودين عشان يساعدوك اول يوم
اي حاجة مش عارفها اسألهم فيها
وهتلاقيهم بيوزعوا الجدول عليك
او هتلاقي الجدول متعلق عند الشئون
الجدول بيبقى صعب قوي تفهمه اول مرة تشوفه عشان كده هاشرح نظامه
دي صورة لجدول السنةقبل اللي فاتت
ليست هناك تعليقات:
إرسال تعليق